![[R]Evolution](https://revolution.lu/wp-content/uploads/2019/04/cropped-cropped-Unknown-2.jpeg)
The Primal Blueprint, Mark Sisson
Fir mech net nëmmen e Meeschterwierk a Punkto Motivatioun: the Primal Blueprint vum Mark Sisson.
Et ass net dat éischt Buch, wat ech zu dem Thema gelies hunn an och net dat lescht. Mee fir mech bis elo definitiv dat Bescht: de Mark Sisson versetzt een, op seng typesch amerikanesch Aart, an eng Form vu Begeeschterung, déi bei Fachbicher éischter seelen ze fannen ass. Hien schreift hei net nëmmen iwwert de Primal Ernährungsprogramm mee och iwwert d’Liewensart, déi dat Ganzt perfekt ofronnt. 10 einfach Regele bestëmmen, ënnert anerem, säi Programm a se stäipen sech op fondéiert historesch a biologesch Recherchen:
- Iesst vill Planzen an awer och (gesond!) Déieren
- Evitéiert toxesch Saachen
- Beweegt Iech regelméisseg an engem luesen Tempo
- Hieft schwéier Saachen
- Leet deen een oder anere Sprint an
- Schlooft adequat
- Spillt
- Genéisst genuch, awer net ze vill Sonn
- Evitéiert domm Fehler
- Benotzt Äert Gehir
Dat klengt alles esou banal a selbstverständlech, dass et eigentlech iwwerraschend, wann net esouguer erschreckend ass, wéi wéineg Leit sech drun halen. Wann Dir Iech no deser Philosophie riicht, da gitt Dir e grousst Stéck sou genanntent “Allgemengwëssen” op, wou jo nach ëmmer behaapt gëtt, dass ee Fett soll reduzéieren, méi Käre soll iessen a regelméissege Sport soll dreiwen. Wann Dir awer Primal wëllt liewen, also schlank, fit a gesond sinn, da musst Dir: méi gutt Fetter konsuméieren, Kären evitéieren a manner chronesche Sport dreiwen. D’Allgemengwësse fonctionnéiert bekanntlech net. Et mécht ons fett, krank a stresst onse Kierper an ons Séil. Dëst Buch kann Iech dozou motivéieren, deem de Réck ze dréinen.
Kommentare